रियाद। इराकबाट प्रक्षेपण गरिएका ड्रोन आक्रमणपछि साउदी अरबले आफ्नो महत्वपूर्ण तेल निर्यात मार्ग पूर्व–पश्चिम पाइपलाइनको सञ्चालन अस्थायी रूपमा रोकेको छ । होर्मुज जलडमरूमध्यमा अवरोध भएपछि वैकल्पिक मार्गका रूपमा प्रयोग हुँदै आएको यो पाइपलाइन बन्द हुँदा तेल आपूर्तिमा थप दबाब पर्न सक्ने देखिएको छ ।

साउदी विदेश मन्त्रालयका अनुसार रियाद र मदिना क्षेत्रमा रहेको पाइपलाइनलाई लक्षित गरी धेरै ड्रोन आक्रमण भएका थिए । आक्रमणबाट केही मानिस घाइते हुनुका साथै भौतिक क्षति भएको जनाइएको छ । साउदी ऊर्जा मन्त्रालयका एक अधिकारीले सावधानीका रूपमा पाइपलाइन सञ्चालन रोकिएको बताएका छन् ।

मध्यपूर्वमा युद्ध सुरु भएपछि साउदी अरबले यान्बु बन्दरगाहसँग जोडिने पूर्व–पश्चिम पाइपलाइनको प्रयोग बढाउँदै आएको थियो । यसैबीच, बिहीबार खिचिएका भूउपग्रह तस्बिरमा मदिना नजिकै कालो धुवाँको मुस्लो देखिएको थियो ।

इराकी प्रधानमन्त्री अली अल–जैदीको कार्यालयले आक्रमण इराकी भूमिबाट भएको पुष्टि गर्दै दक्षिणी प्रान्त मैसानका सुरक्षा कमान्डरलाई पदबाट हटाइएको जनाएको छ । इराकी सरकारले घटनाको निन्दा गरेको छ ।

तत्काल जवाफी कारबाही नगर्ने साउदीको निर्णय

साउदी अरबले इराकी प्रधानमन्त्रीको आग्रहमा तत्काल जवाफी कारबाही नगर्ने जनाएको छ । इराकबाट साउदी अरब तथा छिमेकी देशमाथि हुने आक्रमण रोक्न इराकी सरकारले गरिरहेको प्रयासलाई समर्थन गर्ने रियादको भनाइ छ ।

यद्यपि, आफ्नो सार्वभौमिकता, सुरक्षा, पूर्वाधार र नागरिकको सुरक्षाका लागि आवश्यक सबै कदम चाल्ने अधिकार सुरक्षित रहेको साउदी सरकारले स्पष्ट पारेको छ । बहराइन, जोर्डन र कतारले पनि आक्रमणको निन्दा गरेका छन् ।

आक्रमण र मध्यपूर्वमा बढ्दो तनावका कारण अन्तर्राष्ट्रिय बजारमा कच्चा तेलको मूल्य प्रतिब्यारेल १०० अमेरिकी डलरभन्दा माथि पुगेको बताइएको छ । यसैबीच, इरानसमर्थित यमनका हुथी विद्रोहीले साउदी तेल बोकेका पानीजहाजमाथि आक्रमण गर्दै आएका छन् । उनीहरूले लाल सागर र बाब अल–मन्दब जलडमरूमध्य क्षेत्रमा आफ्नो नियन्त्रण थप बलियो बनाएको दाबी गरेका छन् ।